يا روح

يا روح من انت ؟  كيف ولدت ؟

تسبحين في عروقي  في جسدي

تلملمي أحزاني تفرحي لسعادتي

تخطي خطواتي  تسرحي تلتصقي

بأيامي , تلهثي مع أنفاسي تحلمي

تلازمي سنيني

آه .. لا تتركيني

لا ترحلي عني ابقي لتواسيني . اغمريني

أيتها الروح الجباره  تركت جسد امي وابي

أصبحوا هواء نقي , اتنشقه حرقة وحسره

لا أراهم ..أنا أشعر بهم يضربوا احساسي

ويعصروا  فوءادي

يا لسحرك أيتها الروح  تحركي  كل شيء في نفسي

بخاطرك تأتي ,   وبخاطرك ترحلي

يا لقسوة الحياة  وقسوتك

الذي تراه عيني  سيراه أولادي

ويتلوعوا بلوعتي

لا  ترحلي .. ابقي  كرمه لأبنائي وأحفادي

يا حرقتي على  أهلي وحرقة أولادي

لرحيلك عني ,,  يا روحي ابقي

فلولاك  لبقيت سرابِ 

 

 

وياما كان..

 

برد وشتي جنّو عشباك غرفتي

 أنا بالتخت دفياني

وجّي تحت حرامي   مختفي

بتنفس من  فتحه صغيرة عملتها

ومنخاري مجلد لوحدو   ومنتشي

صوت الرعد بخلي بدني يرج متل   المجرشي

وانا مكنكني بفرشتي  بشم ريحة الفحم

الحراره بتقرب وبحس اني   متشتشي

وصوت امي يناديني حاملي صينيه وهي   ملشلشي

يللا ياولاد الترويقه جاهزه  والخبز على

المنقل احمر   محمصي

الشتا برا مقهور بخبِّط عبوابنا متل الحرامي المرتشي

انا واخوتي , ضحك ولعب,همز ولمز

وبطل بي علينا    ومنختشي

البرد والشتا  جنّ , والرعد والبرق  يرن

ونحنا بغرفتنا   نكن

وامي قاعدي تراقبنا   والدمع بعينها  يحنّ

كان… وياما كان من قديم الزمان

بعدو ببالنا بِعِنّ .

شتّي يا دنيا شتّي

يا سما انتفضي وبالعاصفه اشتدّي

من شو خجلاني ؟! جنّي !!

عيني اشتاقت للغيم  للشتي , يللا

اتجمعو ,

رقصة العاصفه والرعد , مشتاقه إسمعو

والبرق جوا عيوني  يلمعو

مع ريحة الارض والشجر , بتبل قلبي المنتظر

يا شتا  الزرع  ناطرك  و عطشان

والورد بصلّي .. بل ريقو شي بلّه

بوجودك  بصير في تغيير   بيحلى السهر الطويل

شوية حطب منحرقو , والكستنا على نار هاديه

منحمصو , والضحك بالبيت بتسمعو

والكنكنه بحضورك  بتلمسو

شتي يا دني شتي , والبرد عبوابنا  دقي

إنت الخير إنت الرزق إنت الحب الي بقلبي..

هبّي..

الصمت

أدور  حول  نفسي  ..  أدور  أبحث  عن  إحساسي

أرقص  حائره  فاقدة  الحواسِ

شاحبة  تائهة  بين  الناسِ

يبلل  المطر  وجهي القاسي

رياح  تمرجحني  كشجرة  وسط   صحراء  منسي

صمت  في  داخلي  حرّك  اوجاعي

سكوت  الجسد  الم  بكل  المعاني

امل  ينتظر  فوءادي  ليشدني  الى  مكان  الودادِ

فالوقت  خير  معادِ….

الخريف

نفحا ت بارده ,  والغيوم  الرمادية  ملبّده

وسِحِرْهن…بقلب  عيونك  مجمّده

نسماتها  بتدئرك  ,  بتحرّك  عواطفك  الراكده

بتشدّك  وأنت  ماشي , وأوتار  قلبك  بتنبض 

على الهادي..

بقولو  عنّك كئيب  , روحي   بتشوفك    

ساحر  مهيب

بعيشك  بتقلُّباتك ,  ومع  كل  قلبه

قلبي بطيب.. شو رهيب

أوراق  الشجر  بتهر  وجاهزه  للرحيل

والارض بتتهيىء .. للتبديل

على حافة  الوادي  تلونت  ولبست توب جديد

لوحتك يا فصل  إكتملت والعين فيك  شريد

يا  خريفي  هِلّ عليٍّ هِلْ

بنطرك  كل  سنه  مره  لطّلْ

لا  القلب  بكلّ ,  ولا  العين  بتملّ

وشوقي  إلك  رح  يضلّ

 

 

 

 

روح مْسَيَّره

حيره  وأفكار  عم تمرق ..  والقرار  جمر  بيحرق

طريق  مقسوم  اتنين  .. من  ورد , و حجر صوّان

بين  الزهرات ,    شوك  مسنّن  على  الجَنْبين

قَطفْها,  بيجرحك  من  المَيلين

تحت الصخر  , معبّا  جواتو  شتلا ت  البيلسان

لتوصَل  إلهن , الوقت  بدّو  سنين

والروح  محتاره  , ضايعه  بهيدا  العمر

ياخساره

ملبكي , بوجها  حيطان  مشربكي

وأملها  قاعد  بحِلّي  ,  ومِتْشَبّكي

ما   في  راحه  , إللا مقابيلها  اوجاع

بنبكي

 

يا  روحي  طيري  وعلّي

خبري  الهوا  عنّي , وما تْملّي

بلكي  شي  نسمه  مارئه 

 حاملي معها  مراسيل  طارئه

 مخبا بقلبها ….شي  حَلّي

الحريه

كُلُّ  شيءٍ ,  تَحرّكَ   من  مكانه

إقتُلِعَ  الصداء ,  عن   جوانبه

همسات  تسمعها  ,  تشدك  للمغادره

آن  الاوان ,  لتتخلّص  من  القيود  القاهره

روحٌ ,  تسبح   للمقامره

نقسٌ ,  ملّت   المثابره

عزلةٌ ,  تخلق من الضعف   قوه

نبضات القلب  , تتصارع   للحريه

أنفاس تلهث ,  لتكسر سلاسل  العبوديه

إنها  طاغيه ,   بكل زاويه

أين المفر؟  كيف تستقر؟

قمْ  وسرْ , لا تلتفت الى الوراء

دع  خطواتك ,  تُقرْ

إبتهج

كل  ذرّةٍ  على الارضِ , تُسرْ

عانق  الحريه , واسْتبْشرْ

فإنها  غذاء  الروح ,   لكلِّ  البَشَر

 

عاشقة الموسيقى

أغمضت  عيني مستلقيه 

سرحت لسماعي  الموسيقى الحالمه

صعدت  معها  الى  السماء  فرحه   لامست  النجوم  مقشعرّه

سبحت  بالفضاء  راقصه

تخدر   جسدي  وأنا    مسترسله

حيناً  تدق  قدماي  الارض  ,  وحينا  أطير  سارحه

صورٌ  عجيبه !  أراها  لأول  مرّه

لحن  يجعل  لمخيلتك  نظرة  خاصه

كيف  تأتي  الموسيقى  بأنغامها  الرائعه؟

تحرك  السمع  كما يشتهيها

تبلسم  الروح  العطشى

تدغدغ  الحواس .. وأنا منبهره

أغفو  على  الكنبه

استيقظ  لصباحي  مبتسمه

فأنا  عاشقة  الموسيقى..

 

 

سبحانك ربي

 

أبها البحر العميق الغريب في  سرِّه

ماذا تخبىء  تحت  تُرابك  المتبلّلِ

أدخل   في عمق   الاعماقِ

أبحث  عن  سرٍ   إبتلعته  الاسماكِ

أرى  لوحات  خُطِطت

لها    من  الاعالي

أسمع   موسيقةٌ   مختلفةُ   المعاني

أصداف  تلمع  متلألئه بين الصخورِ

أرى  وجهك  يا الهي  في  كل  مكانٍ وزماني

إنه  يدهش  عقلي  !!  أكرمتني  بنعمة وجودِ

أعشق  الحياة  حتى  حبّة  الرملِ

لساني  يعجز  عمّا   يرا ه بصري

سبحانك ربي  بخلقك  الابدي

 

الرقص مع الحياه

عذرا يا  سيدي 

في صدري  كلامٌ  يوْلمُ  أضلُعِ

أرى الحُزن في عيونك  المتد بلِ

أسمع  صوتُك  يرتجف  من  القلقِ

بأنفاسك  نبرة  ألم  الزمنِ

تتحركُ  بالارضِ  كطائرٍ  قُصِفَت منه الاجنُحِ

سأنفُخُ   من  روحي  نفخة  الاملِ

عسى أن تسبح  فيها  اعصابك  المتشنجةِ

أُنظر  الى السماء  فيها   موسيقة  الوفاءِ

تأخذ  منها الهواءِ   تتلون عيونك  بالصفاءِ

انظر الى الجبالِ , عاليةٌ  شامخةٌ  

يردد  الصدى  عند  سماعِ  صوتك ,  يناجِ

أرض  وشجر  وزهر  ينتظرون  قدومك  ايها  الآد مِ

تمسح على  وجهك  العطر المتشكلِ

لا شيْ ينفع..ان حصرت  نفسك  بمكان

  أو  زمانِ  

قد قطعته  كان غير  عادي .. وقاسِ

ارقص  مع  الحياه  الفانيةُ  ,  أقْدِ م عليها  بقلب  مُتعطشِ

وبروحٍ  مُتلهفِ

يا سيدي  ذقتُ من  الصدماتِ  الكثيرُ الكثيرِ

ذهب  قسم  من  العمرِ  ,  ولم  أستطيع  أن  أرده  الى جسدي

كن سعيدا  بأيامك  المتبقيةِ

فإنها  ستكون  الاجمل  من  السابقةِ.

صديقك

قرب من جيلك ما تخاف .. جيلك هوي دليلك

قادر يحميك يشيلك .. ويفهم شعورك وتفكيرك

بتعيشو سوا ذكريات الماضي.. ما بتكون إللا

سعيد وراضي

أفكار هالجيل محيّره .. حب التقليد مسيطره

بتحكيه ما بيسمع .. بتهديه ما بيشبع

زمنّا زمن القناعه .. عندو من الصبر والكد مناعه

قلبو كبير وسرك جواتو مسكر بجنزير

خلّي الضحكي تطلع  وتصدح  .. وما تخلّي

بنفسك  مطرح

يللا  حط  ايدك   على  ايدو  وإمرح

وإمشي   بطريق  مزروعه  ورد  مّشّح

كل الالوان  بقلبها   بيشرح

والشجر  عجنابك  جاهز  لقدومك

ليمرِّق  صديقك  إللي  ناطرك

             إفرح.

 

 

يا أبني

حبيتك  بالملفّة  وأنت  بين إيدَ يي

حبيتك  لما أخدت  صدري  وعرفت  شو هيّ

حبيتك أول ما مشيت وكرجت عليّ ولفظت إسمي

يا سندي ويا عينيّ

حبيتك لما أخدت شهادتك وقربت مني وحضنتني بحنييّ

يا ابني انت النور أللي بشوفو  أنت حقيقتي بدنيتي

انت همي اللي حاملتو على كتافي

يا شمعه مضوايي

الله يوفقك يا ابني بحياتك الصعبي

 الله يكون معك وين ماتروح

يا جنى عمري …وجنى دياتي.

كانت

 تمشي  وتتبختر  عالارض  ..  تضرب   إجرا  طول  وعرض

طلِّتها  أحلى  طلّي  ,  الضحكي  عاشفافها  بتحيي

أحلى  فرجي   بتشوفها  ,  وهيّ  راكبي  عحصانها

العز  لايق    عليها  ,   والاجمل   شرحة  عيونها

بالسهره  لمّا   تحضر  ,  الكل  ببلش  يسكر

ريحتها  بْتِعْبق  بالجو 

            و الليل  بوجودها  بيسْحِر .

كانت  ملكه  بزَمانها  , والدني  مش سايعتها

سنين  مرت  عليها ,  والمرض  أثّر  عرجليها

صارت  قاعدي  بوحدتها  بدو  مين  يواسيها

الحياة  الحلوه   من   حياتها   ضلّت  وضلّت  بخيالها

              بلّشت تعد  إيامها  …

هللق قربت تفل  !  وهيي  بدها  تضل  !  لتركب

 عحصانها  الابيض ,  إلّي  ناطرها   ببستان   الفلّ .

عيون حنوني

عيون سهراني , وعيون دبلاني  وسكراني

عيون سارحه  محتاره ,  وعيون  شارده

ومش  شبعانه

وفي عيون  حنوني  دايخه   بأفكارها

خطوط العمر تقلو  عجفونها

سحرْهُن  زاد  من   حِملها

نور  بموج  عجنابها  وبيضوِّ  عرموشها

من كتر ما شافت  لَمَعِتْ  بتحس  انها  دمعت

قوْيت  ونوَّرت  , بداخلها  اسرار  وفيها  أخبار

حكايات  وحكايات  كتار  كتار

لغز من الخالق   رسمها ,  بتشوف

قوِّت  الابداع ……

سُبحانك  وسبحانها

يا عين  افرحي  وانت  بتكبري , مناخد  من قلبها  الوحي

منكتب  بقلامنا  عنك  ومننحني , بيخجل الورق منك

لما بيحكي عنك

يا عيني ويا نور عيوني

ما تتلبكي…

يا سنيني رجعيلي

يا سنيني اللي  رحتي   منّي

إنت  غيتاري  بأوتارو  الحزيني …

أحلام كتيري عشتها.. ما قدرت  حقّقِتْها

صراع الجدود  وحرب الوجود

ضاعت بزْواريب  بيروت

يا زمن ..عود..عود

القلب بدِق ..وروحي بتْنق..وأفكار عشوائيه

متل المجنونه إللي مضيعه الهويّه..

يا سنيني إللي رحتي   منّي..ارجعيلي

خديني لرفرف بحيِّ القديم  وعيد إللي انسرق مني

وعيشو  كل يوم بيوم

إمسح جبيني غنّي وإرقص على مسرح الحياه

وإنت تسقيني ..

قمري  ناطرني  ونجمة  الصبح  بترصدني

هيدي الرفقه القديمه شاهدي على حياتي الاليمه

شوية غبره بعدها …علكتاف

رح انفضها وامشي

بِضَلّ حلم.. صعب  يرجع… و ينشاف

الحياه نَغمه كيف ما كانت هي نِعمه  منرقص معها ليوم الرحمه.

نسمة الهوا

وانت سهران بهالليل وسارح بسما ربّك

بيلمع نجم سهيل وبقلّك أنا بأمرك

بتقلّو لحظه شوي أنا بعرضك

مرت قدامي ريحة الياسمين والزنبق

ونسمة الهوا العليل بتلعب مع جسمي النحيل

بتشفي القلب من الهم التقيل

الهوا مثل الحرير عم بشيلني من هالبير

حملي أنا صار كبير

ناطر وسهران لتطُّل النسمه المعطْره الذكيه

تفتح مسام قلبي شويه آخد منها الزواده

لدبِّر امور ولادي ..

أنا وهالليل رفيقي الجليل,ونسمة الهوا بتميل

وتجذب عيني الكحيل,بسهر معها السهر الطويل

شو بدي من القال والقيل

نسمه حامله معها عطر السنين الّي راحت….

وبعدها بإيدي لأكبر دليل

بتسحب معها ريحه الورد على أشكالو

روايح مختلفه وشو بتستحلو استحلو

أجمل سهره بتسهرها لما تكون لوحدك معها

أجمل إحساس إنك تحبها وتتفرغلها

الطبيعه إلك ملكك,مابيقدر حدا ياخدها منّك

وإنت سارح بسما ربّك , دبلو عيونك

غفيت ونسمة الهوا بتمرجحك,والطبيعه بتحضنك.

ونجم سهيل ناطرك …بقلّك أنا بأمرك….

ضايعه..بين النار والجنّه

شو النّفع تحبني أو تسأل عنّي..وأنا ضايعه بين النّار والجنّه
أمل بياخدني لحياه الراحه والسكينه , ولمّا بيخلص نهاري
بشوف حالتي المسكينه , روح حب وحدي قلبها فاضي
ما تكون مثلي معشعش فيها وجع الماضي , لا قادره تنسى
والحياه عليها بتقسى ,بيدخل الليل عليّي.. بكره العتمي
بصبِّح مع نهاري…..ونهاري هالكني..و تاعبني

ليه أنت موجود؟

 

ليه إنت موجود؟…شو في بالوجود
ليه ألله خلقك ؟…شو بدو منًك؟ بشو
موعود؟
الحياه الغامضه قتلتنا..غادرونا احبابنا
تركونا!..بالقلب غصّه ورا غصّه ليه
خلقنا؟..بضل هالسوءال براسنا يشغلنا
شو الهدف من وجودنا؟
ليه منفلّ…..ليه ما منضلّ
لو العمر بيبقى عمر الشباب
لتقول انت أنا اكتفيت ..بدي
إضهر من هالباب..ليه رسمة الوجود فيها
عذاب..ليه ما نحنا منختار الغياب؟
السر كبير..ما قلو تدبير..وراسي وجعني
كتير..يللا بلا تفكير

شجرتي الحنوني

كل يوم أول ما إصحى من النوم , بلاقيها ناطرتني,بصبّح عليها وبتصبحني
حنوني مخيمي بوراقها عابلكوني, وراقها ملوَني, فيها الاخضر والباتنجاني
بشرب قهوتي , وعيني فيها,وهي بتضلّ عليّي صاحيه وسهراني 
               الصبح بصبِّحها…وعشيّي بمَسِّها
قِلتّلها كبرتي وصار ظهرك مِنحني,قادره تحملي وراقك بهالليوني؟..وبترقصي
               كلل الوقت  يا حلوتي ويا عيوني؟
قالت أنا موجودي إلك ولكل مين شافني,المهم إسعدك وإسعد إللي حبني
        قلتلّها بضلّ جمالك آسرني …رح تبقي لكحّل جفوني
قالت إنشالله يبقو عليي موجودي…وما يلغوني من وجودي
وبيوم صحيت ما لقيتها !!! جن جنوني وبكيت لفراقها !! كانت متل إمي الحنوني
شو الانسان ظالم ! ما بيعرف شو قيمه الشجر العارم ! وشو فايدتو بالدني
وراح نظري على الارض..لقيت شروشها بعدها بتنبض..قرَبت منها وقلتلها
ما تحزني ..انا قلبي عليكي صار محزني..رح كون إلك وجنبك إرعاكي وضلّ
حدَك واسيكي ..وتزيني البلكون اللي ناطرِك…بكره بتكبري
بصير أنا لازم ودعك…إنت رح تعمّري بأرضك ..وأنا مش قدَك
            يا شجرتي الحنوني

فشّة خلق

يا أنسان شو هالبلد!!شو هالسياسيين!!؟؟..ما عندهن لا شرف لا ذمّه ولا دين
أكلنا الطعم نحنا..ما عدنا عارفين بدنا الناصر مين وللاّ مين..واحد بياخدنا شمال
واحد بياخدنا يمين..وعود ووعود صارو مكدسين..لا بدنا ياكن ولا البلد محتاجه
                          لهيك سعادين                                        
بدنا رجال يهزّوا جبال ..بدنا نام مرتاحين..وولادنا يعيشو مهنّايِن
العالم بينهش بلحمنا !!  وهنّي على الكراسي سكرانين!! شياطي،!! كذابين!..ونحنا 
             الشعب  مسحورين                              
                       لوين رايحين؟؟

سنين بتعدّي مع الوحدي

 

عيد بمر..شهور بتمر..سنين بتعدي مع الوحدي
القلب مجروح, وجواتو بتنبض الروح …وحيد
شريد…ناطر مين يفتحو , الفراغ رح يقتلو…
ليه لما يكون جوات الانسان..حب ,اخلاص وحنان
بينه وبين السعاده مسافات..بدو صدر حنون  ,
يفهم شو عندو اهات..جسمي ببتحرك للشقى ,للتعب
ساعات وساعات, نشفت عروقي وجلدي جف
بدى سقايه غرام ولمسة عطف..بدي الحب يدبدب
لعندي دب ..بدي إسكر
على صوت الغرام, وما بدي حدا يعرفلي درب

اكتئاب

شربت مَيْ طَعْمتِها.. مُرَّه ؟  
أكلت لقِمه وجوّاتها.. فارغه?
ضحكت ؟ ما سمعت صوتك
 ولا إلّي حدّك بالمَرّه؟  
 
استمتعت بالطبيعه ؟ وبوِجّك حاجز
   مانعك  تِدْأرها ؟  
     
دْفيتْ بحرارة الشمس وهي جاي لعندك
أو بقيت بردان ,وما لامست جسمك
سمعت الحديث اللي كان بدور حدّك
او كان الحديث متل صوت الدِّبانه
       بِوِنْ باذنك
حسيت شي مره وإنت لوحدك
   كاره حتى تاخد نَفَسَك
بتشعر انو إلّي حواليك من الناس
   خفيفه ..ولا بتهمك  

 
       بَرّ..بَرّ..بَرّ
  
  !! صارت افكاري مخيفه
شو رأيك..هيدا إكتئاب أو أنا عم حسّ  بأشياء.. سخيفه

الباب

 

بمجرد  ما تغمِّض  عيونك ,  بتشوف  باب  قدامك

جايي  من  بعيد ,  بِقرِّب  منَّك ,  لونه  أسود  , ما بتعرف
إذا دخلت  من ا لباب  لوين  بِوَصّلك  , شو  قولك  ؟ 

  ليه  بتشوفو  ؟  شو في  تحتك  ؟ لغز  غريب  
حشريتي  لازم  أعرف  شو  في  عن  قريب 

 بغمِّض  عيوني  , بحاول  اتسلًل  من  بين  , جفوني
لازم  اوصل  عالباب , إصراري  خلاًني  مجنوني,

 كل  ما قرَّبت  من  الباب  , الباب  يبعد  عنّي
دقات  قلبي  بتسرع  , لازم  فوت  لداخل  العتمي,

 بدِّي  أعرف   شو هالباب  إللي  كلّو   لغز  , ومحيّرني
رح  حاول  كل   ليله   إدخل  بقوتي,

 فجأه  قلت  بنفسي.. هيدا باب الاحلام  ! أ نا بدخلو  كل يوم
ما  بعيد  عنّي   , لما  يجي   ملك النوم  بياخدني  للحياه  التانيه!!

بشوف  فيها  الافراح  , والاحزان

  الاصحاب  والاموات, من  كل  زمان  ومكان..

 الله   قادر على  كل  شي , يا ظاهر  ,  يا باطن
يا  حنّان  ويا منّان .
                            هيدا  إللي  وصلّو  عقلي
                            وهيدا  باب  …ا حلامي.

.

نق.. نق.. نق

على مهلك عشغلك شوي ! ارحم صحتك,ارحم عمرك خْطَي

العمر بيخلص, والشغل ما بيخلص !  اعطي فرصه لنفسك,بكرا

بتبرك بفرشتك شوبيبقالك ؟
إرحمني!!وإرحم غربتك عنّي!!.عيش شغلك وأعطي يوم لغيرك؟
خود فرصه ترتاح  وتريح إللي حدّك
العمر واحد مش اتنان , عيش وقتك, وفّرح اللي جنبك عطشان
شوف الحياه شو حلوه , ما رح تبقالنا دايمه
شو ناطر ! تحررك  خدني  كزدوره  بّدي  حس  شويّ  بالفرفشه
مشوار  صغير عالروشه. .نفسي بعرنوص دره  وقينه كولا وقشّه ,جارتي
كل يوم بمطرح ! روح  شوف  كيف  بتضّل  حياتها  عم  تسرح  وتمرح
إمي عتباني عليّي !..وخيي قلّي ما  رَحْ  ادعس بيتك  برجليّي
وينااااك
ليه ما عم بترد يا عَينيّي !! يقصف عمري ضهر زعلان منّي !  يلعن لساني شو
مطاوعني..يا ويلي ..الحياه فانيه , ما في وقت , عمرنا رح يمرق.. بثانيه

المرايه

 
 

 
 المرايه هيي الصديقه الوفيه..بتخبْرك كل شي بصدق وعفويه
 ما بتقدر تكذب عليك….حاضره. ….ناطره…. لروْياك
    المرايه هيّي القصه,والغنيه…هي الرقص…والشفافيه 
 بتصحى من النوم بتشوف صورتك جواتها…وعينك بعينها
 بتقراك بصراحه وبتقلك, شو فيها.. بتخلّيك تتحضَرِ لنهارك
 تتمنى عين الله ترعاك
 مرايتك بتكون احيانا , قاسيه بتجرحك…بتشوف حالك …قرد
معفرت لمّا توصفك !! بتقلّك إنّك ملك… قاعد على عرش
          مش إلك ما تضحك على نفسك
بترضى عنَك وإنت هادي ,وعلى طبيعتك… المرايه بتعكس
نفسيتك ما فيك تخبي عليها شي !..لأنها بتشوف كل المخفي
فيك تخبي عن الناس إللي جواتك…قدام المرايه ما بتقدر, إللا
ما تفضحك..حب حالك لتحبك…إضحكلها…. بتضحكلك
   صورتك بقلبها ..باقيه,على الصدق,عالجنون

     ماشيه..معك  معك  للنهايه .. المرايه..

ماإلي خاطر روح والفظ الرّوح

 
           بدّي ضّل…. ما بدي فلّ
 بحب الارض.. بحب السما..واللي بناها ورسما
بحب ريحة الحياة….لازم كون شي قبل الممات
الساعه بتركض…. وأنا بركض لوقفها ..عمهلك
عليّي…ما تحرقي رجليّي..بخاطري عندك…لا
        تقاسيني….ما تدوري حواليّي
مع كل طلوع شمس وغروبها…أنا ضايعه بدروبها
        ضلّي يا شمس ,  لاتغيبي
بعدو مشواري بالحياة حاملتو..بضعفي ….وبقوتي
                بدي اشفي غليلي
  والساعه ورايي بتلحقني…روحي عنّي….بدي ضلّ
                ما بدي فلّ
               
                      ما لي خاطر روح والفظ الروح.  

ما تقول آه..لناس مسطَّله لألله

 لاتحكي  ولا  تشكي.. ما رح  تسمع  الجواب
      الصدا  بضل   يدق  على  البواب
     ما تقول  آه..  لناس  مسطله  لألله
ما في  حب , مافي ود , ما في ا ذن  بتسمع  لترد
إنك  تحكي  وراسهن  يهز!! .. وهنّي عم بفكرو
           بشي  أكله  ولا   ألذ ! ما عدنا  نعرف  الصالح   من  الطالح
       كلهن  بدورو  على  المصالح
  سنين  عم  تقطع  فينا. . وعمرنا  عم  ينسرق  منّا
      ولو  ما في  امل   لتحطّمنا

الدنيا بتمر….والحياه بتستمر

 الدنيا بتمر….والحياه بتستمر
     الصغير  بتنبت وراقو, والكبير
           وراقو…بتهر 
     الدولاب بيبرم..بيطحن بيجرم
          وبيبقى  التاريخ
    حروف وأسامي بتموت واسامي
           بتبقى  للخلود
    يا دنيا شو سرك كبير ما بقدر قول
           غير هيك تعبير 
    منبكي منضحك منحزن علمسلك
          وجيل بيمحي جيل
    لو قد ما عشنا من حس العمرقليل
    لو منقدر نتغلغل بسر الوجود
       ونفهم ليه هوي موجود
          
 يا ريت الفرح يبقى وتبقى الايد

على وتر العود ..والحزن ما منعرفو

وما يكون إلو وجود.

                    

كل شي بهالدني حي

 
كل شي بهالدني حي..الهوا بيحكي المي ويحكينا
الشجر بناغشنا..بفيينا ..بيحضنَا بالضو, وبليالينا
النهر بيكرج عدروبنا, بيسبقنا ليسقي زرعنا ويسقينا
والجبال صامده وشاهدي علينا..
والارض, حاملي رجلينا..الزهر بالوادي ينادينا
لنطل ونقطف مواسمنا..والبحر يمد جناحو
على شطوطنا يداعبنا.. يسلَينا.. والرمل بيحرقنا
ليضحك علينا وهمَو يسمعنا..وقمرنا اللي عالَسهر
حاضر معنا..رفيقنا ..مابيتركنا.

لو مهما صار…..رح نكمًل المشوار

شو بيك محتار وعم يغلي قلبك مثل النار
الايام جايه ومصيرنا نلتقي ونحكي أخبار
ونفضفض شويه……ونفرح بهالمشوار
الحياه حلوه…إذا كنت سعيد بتكون إنت
صانعها وإذا كنت تعيس بإدك إنت تغيرها
الحياه صارت غريبه..منسمع عنها أشياء
مريبه , وكمان منشوف حلاوتها العجيبه
لو مهما صار…رح نكمًل المشوار

رزق الله على أيام زمان

رزق الله على أيام زمان  … نحنا وصغار نشرد, نقول
شو في لبعدين ؟ … . كنَا نحلم ونحسَ انو الدني  خالده
حلوه . . معطَره فيها الامان .. نركض , نلعب  ونتخبى  بالدكان
 نسرق الشوكولا من وين ما كان , نشم التراب نحكي
 الورد , نتفيَه  تحت  شجرة  الرمان
 ما في هم  ولا غم , مافي  حرب  ولا دم , بهيك الايام 

رزق الله على ايام زمان